முஸ்லிம் விவாக, விவாகரத்துச் சட்டத்தில் உயர் நீதிமன்ற முன்னாள் நீதியரசர் தலைமையிலான குழு மேற் கொண்டுள்ள சிபாரிசுகளை மேலும் ஆராய்வதற்கு உலமா சபை கால அவகாசம் கோரியதால் சட்டத்திருத்தங்கள் தொடர்பான இறுதியறிக்கை எதிர்வரும் ஜனவரி 29 ஆம் திகதி வரை ஒத்திவைக்கப்பட்டுள்ளதாக குழுவின் தலைவர் உயர் நீதிமன்ற முன்னாள் நீதியரசர் சலீம் மர்சூப் தெரிவித்துள்ளார்.
முஸ்லிம் விவாக, விவாகரத்து சட்டத்தில் திருத்தங்களை சிபாரிசு செய்வதற்கு 2009 ஆம் ஆண்டு அப்போதைய நீதியமைச்சர் மிலிந்த மொரகொடவினால் முன்னாள் உயர் நீதிமன்ற நீதியரசர் சலீம் மர்சூபின் தலைமையில் குழுவொன்று நியமிக்கப்பட்டது.
இக்குழு நேற்று 13 ஆம் திகதி தனது அறிக்கையை பூரணப்படுத்த திட்டமிட்டிருந்தது. அறிக்கையில் குழு அங்கத்தவர்களினது கையொப்பங்களையும் பெற்றுக் கொள்ளவிருந்தது.
நேற்றைய கூட்டத்தில் உலமா சபையின் தலைவர் அஷ்ஷெய்க் எம்.ஐ.எம்.ரிஸ்வி முப்தியும் செயலாளர் அஷ்ஷெய்க் எம்.எம்.ஏ. முபாரக்கும் கலந்து கொள்ளவில்லை.
தலைவர் ரிஸ்வி முப்தி வைத்திய சிகிச்சைக்காக கனடா சென்றிருப்பதாக அறிவிக்கப்பட்டிருந்ததுடன் சட்டத்திருத்தங்களை மேலும் ஆராய்வதற்கு உலமா சபை கால அவகாசமும் கோரியிருந்தது. இதற்கமைவாகவே இறுதியறிக்கை எதிர்வ-ரும் ஜனவரி 29 ஆம் திகதிக்கு ஒத்திவைக்கப்பட்டது.
குறிப்பிட்ட அறிக்கை கடந்த நவம்பர் மாதம் 28ஆம் திகதி பூரணப்படுத்தப்பட இருந்தாலும் கண்டி போரம், நளீமியா கலாபீட பட்டதாரிகள், பல்கலைக்கழக முன்னாள் வேந்தர் ஹுசைன் இஸ்மாயில் ஆகியோர் சில திருத்தங்களை முன்வைத்ததனாலேயே சிபாரிசுகளை பூர்த்தி செய்யும் காலம் நேற்றைய தினத்திற்கு (13) ஒத்திவைக்கப்பட்டிருந்தமை குறிப்பிடத்தக்கது.
நன்றி: விடிவெள்ளி
No comments:
Post a Comment